“Prezidentin apardığı islahatlara qarşı çıxan “gözəgörünməz” qüvvələr var”





“Cənab Prezident və Birinci-vitse Prezident Mehriban xanım dəfələrlə ölkədə yeni dövrün başlandığını elan ediblər. Təbii ki, bu da kadr islahatları ilə yanaşı, rüşvət və korrupsiyaya qarşı mübarizəni də ehtiva edir”.
 

Bu sözləri Moderator.az-a ölkədə bir sıra məmurların korrupsiyaya görə həbs edilməsinə münasibət bildirərkən sabiq deputat, Demokratiya və İnsan Hüquqları Komitəsinin sədri Çingiz Qənizadə deyib.

Ç. Qənizadə bildirib ki, Milli Məclisə seçkilərin növbədənkənar keçirilməsi də ölkədə aparılan islahatların tərkib hissəsi idi:
 

“Bu islahatlar icra strukturlarında da davam etdirilir və bir sıra kadrların yenilərlə əvəzlənməsi ilə müşayiət olunur. Eyni zamanda bu çərçivədə rüşvət və korrupsiyaya bulaşmış köhnə kadrlara qarşı mübarizəni də görürük.
 
Bu gün də belə bir xoşagəlməz xəbər yayıldı. Bu, bir tərəfdən korrupsiyaya qarşı mübarizə fonunda müsbət haldır, ancaq digər tərəfdən bir vətəndaş kimi arzu etməzdik ki, bizim ölkəmizdə belə neqativ hallara yol verən insanlar olsun, onların həbsi də cəmiyyətdə müzakirə predmetinə çevrilsin. Biz rüşvətsiz, korrupsiyasız və şəffaf bir cəmiyyətin, söz və hüquq azadlıqlarının təntənəsini yaşayan bir ölkənin vətəndaşı olmağı arzulayrıq. Bu istqamətdə də iş gedir.
Ancaq görünən odur ki, Cənab Prezidentin apardığı bu islahatlara qarşı çıxan qüvvələr də var. Onların bəziləri bilinir, ancaq bəziləri “gözəgörünməz” qüvvələrdir. Bu şəxslər tədricən aşkarlanıb vəzifələrindən uzaqlaşdırılırlar və ya cəzalandırılırlar.

Təəssüf ki, yenilənmək istəməyən insanlar, yeniliklərlə ayaqlaşa bilməyən “köhnələr” var və onlar tutduqları mövqeləri itirmək istəmirlər. Həm də Prezidentin dəfələrlə etdiyi xəbərdarlıqdan nəticə çıxarmırlar və çirkin əməllərini davam etdirirlər. Ölkə başçısının dediyi kimi, belələri nə qanundan qorxurlar, nə də Allahdan.
Bu gün cəmiyyətimizdə nə qanundan, nə də Allahdan qorxmayan müəyyən adamlar var ki, hesab edirəm ki, onların hamısı gec-tez bu şəkildə ifşa ediləcəklər”.


Facebook-da paylaş